Асашёорюү Дагвадорж зодог тайлсан нь сумогийн ертөнцөд томоохон хөдөлгөөн оруулжээ.Гэхдээ нягт тооцоотой Япончууд үйл явдлын өрнөлийг үндэсний спортоо цэвэр ариун болон жаяг дэгээр нь хадгалж үлдэх нэрээр гадаадын бөхчүүдийг шахах тал руу овжноор чиглүүлж чадсан аж. Саяхан сумогийн холбооны зөвлөл хуралдаж гадаадын бөхчүүдийг сумод оруулах журмыг улам нарийсган чангаллаа. Одоо нэг дэвжээнд зөвхөн ганц л гадны бөх байх бөгөөд тэрхүү бөхийг зодог тайлах юм уу эсвэл Японы иргэн болох хүртэл ахиж нэмэн өөр улсын харьяат бөх авах эрхгүй болжээ. Шинэ журам ирэх сарын эхнээс үйлчлэх хэдий ч он гараад сумод орж ирсэн гадаадын бөхчүүд нутаг буцах нь ерөнхийдөө тодорхой болжээ. Хэрэв үйл явдал ингэж өрнөвөл 3-5 Монгол залуу сумо бөхөөс хасагдах бололтой. "Анти Асашёорюү" гэж нэрлэж болох энэ компанит ажлын гол зорилгыг япончууд "бидэнд ахин хоёрдогч Асашёорюү хэрэггүй" хэмээн тайлбарлаж байна. Сумо нь японы үндэсний спорт тул гадныхан аваргалах, давамгайлах боломж тун бага хомс байхаар бүхнийг бодож боловсруулжээ.